23, ఏప్రిల్ 2022, శనివారం

కదిలే చైతన్య కాంతి

0 comments

కోకిలల కలకూజితాలు

గుండె చప్పుళ్లలో కలిసి

నిశ్శబ్దంలో నిండిపోయాయి 

ఆరని ఒక చిన్న మట్టి దీపం

కొండ కోనలకు కోట్లవెలుగు 

వెల్లువలై పారుతుందేమో

అంధకారంలో నిండిపోయిన 

కన్నీటి నీలినీడలు, ఒక

తటాకంలో విసిరిన రాయి 

కదిలించిన అలల ఉప్పెనలా

నివురు కప్పిన చైతన్యం

సమకూర్చిన సైన్యంలా

పెల్లుబికి ప్రవహిస్తుంది

దావానలంలా, గుండెలోతుల్లోంచి

ఉబికి వస్తున్న రక్త ఘోష వలే 

పొంగే దుఃఖానికవతల 

వేచి యున్న ధవళకాంతుల

కర్తవ్యోధ్బోధక కాగడాలా, 

నీలో నివురు కప్పుతున్న

నీరస నిరాశావాదనను

శలాక ఫలకాలుగా చేసి

పదునెక్కించే శిలలా 

ఓటమిని మరి గెలవనీయని 

సాహస శౌర్యాల ఉక్కు కోటలా 

అన్ని వేళలా అన్నింటా 

నిలువు, నీవే చైతన్యానివై

నిశ్చల సత్వానివై, వెలుగుల

వెన్నెల వాకల వాకిలై..