నీల గగన ఘనశ్యామా!

నీల గగన ఘనశ్యామా!

\\\\\\\\\\\\\\\\\\\\\\\\\\\\\\\\\\\\\

ఉమాపోచంపల్లి గోపరాజు

(రిచ్మండ్ ,టెక్సస్,USA )

🌌నీలాకాశంలో రంగులు 

ఊదా రంగు నుంచి బంగారువర్ణంలోకి 

మారుతూ మారుస్తూ 

విశాల నీలి గగనంలో 

ఏ కుంచెతో అద్భుత రంగులు అద్దుతూ ఉన్నావు

నీ పదాల కూర్పులతో 

నీ పాదాల విన్యాసాలతో 

రచించే నవరసాల 

వాగ్విన్యాసాలలో 

నీ సృజన ప్రతిఫలిస్తూ

అరుణారుణ కిరణ విస్తీర్ణాన్ని

నీ రసహృదయకవాటాల ద్వారా

నిర్మల తన్మయ ప్రకృతిలో

వినీలమౌతూ, విలీనమౌతూ

వర్ణ వర్ణాల ఆకర్ణికా పేయ శ్రవణానంద సుధారసాలను 

కేకికూజిత, పారిజాత 

అపరాజితావిర్భవ రసప్రఫుల్ల

సరసహృదయ 

సముదితోత్సాహాలతో

సకల భువనజనులకు, భువనభవనాలకు

కరకలిత స్వరజనిత లలితపద తాడిత మనోజ్ఞమధురమనోహర

నాట్య నటనా పరాకాష్టాలతో

జగత్తంతా గ్రీష్మ, హేమంత, వసంతాది

కవితా రసాతరంగాలలో 

ప్లావితం చేస్తూ

ప్రభాత రాగ ప్రబోధనలతో

ప్రభావితం చేసే ఓ రవీ

కవితాప్లవీ!

కపిత్థ కంఠారవంలో, 

సుమ కుసుమ పరాగాలలో,

హిమశైల ప్రాభవాలలో, 

నదీనదాల సుదీర్ఘ సమంచిత సువిశాల సముద్ర సామీప్యతాయత్యాత్రలలో

విభవించే త్రయీభావ త్రిగుణాతీత

సుసత్వ శుద్ధ సత్వగుణ పరిపూర్ణ

అమందానంద దాయక నందనందనా

నమో నారాయణాయ

మంత్రాధిదేవతా! 

నారాయణా

మమ్ము కావమను భక్తకోటి

ఆర్తజనవత్సలా, 

శ్రీకృష్ణా!

గోపికా ప్రాణ ప్రణయ 

సుధానిలయా

నమో నమః!

🦚🦚🦚🦚🦚🦚🦚🦚🦚

పాడవే ప్రాణసఖీ

 

పాడవే ప్రాణసఖీ

కృష్ణుని గాథలు 

మదిలో నిండగ

ప్రాణములో, ధ్యానంలో,  

పాటలోని సరిగమలు ఒలుకగా 

పసిపాపవలె 

యమునను దాటి

పవ్వళించేనో 

యశోద ఒడిన 

యమునా తీరాన 

ఆడిన ఆటలు, 

బృందా వనిలో

పాడిన పాటలు

వందల గోవుల

గోప బాలకుల

సకలాపదల

కాచిన విధము,

కాపాడిన విషయము

పాడవే ప్రాణసఖీ

చెలువము మీరగ చెలువుల చేలముల 

చిలిపి నటనలతో చలువము తోడ 

దాచిన వేడుక, 

శరణు వేడగా కరుణను ఒసగిన తడవు

కడవల వెన్నెల, కడలిని మించిన

యెడదల ప్రేమల

పాడవే ప్రాణసఖీ

మధురాధరముల 

మధురిమలొసగి

కన్నియ వలపుల 

విన్నపములన్నీ

కన్నులనిండుగ 

మనసున నిలిచి

తానే మనసై, 

మనసే తానై

వలపుల తలపుల 

తానే నిలిచి

ఈసున మనసున 

వగపులన్నీ 

మనసు లోనే 

భ్రమలని తెలిపి

మధురకు వెడలి, 

బలభద్రునితోడుగ

మనుమడిగా 

తన తాతను బ్రోచి

కంసుని పీడను 

కడతేర్చిన వైనము,

పాడవే చెలీ,చెలీ, 

చెలీ నా  ప్రాణసఖీ !

🦚🦚

శ్రీ కృష్ణా కరుణించరా

మది నిండ నీవే

నిండేవు రా

శ్రీ కృష్ణా యదునందనా

కష్ట నివారా

దుష్ట విదూరా

ఇష్టాయిష్టములు

కలగని వరదా

మది నిండ నీవే

నిండేవురా

శ్రీ కృష్ణా మునివందనా

యశోద నందన,

కష్ట సంహారణ

ఘఠనాఘఠనల

తలపెడువాడా

మదిలోన నిన్నే

తలచేనురా

శ్రీ కృష్ణా మధుసూధనా

 ఆది విష్ణుడవు

నీవే దేవా

దేవకీవసుదేవుల

సుతుడవు

పరిపూర్ణుడవు

నీవే గురుడవు

హే కృష్ణా కరుణించ రా!

ఎందని కానను?

🔴ఓ కారుణ్య పయోనిధీ!

ఎవరన్నారు నువ్వు రావని?

మనసు లోని పొరల లోతుగా

చీల్చుకు వచ్చిన ప్రతి పిలుపూ 

నింగి నేలలు ఏకం చేస్తూ

దిగంతాలకవతల ఉన్నా

నీ సన్నిధాన వరమిస్తుందని 

నీ సన్నిధికే చేరుస్తుందని,

ఎరుకవు నీవని, ఏలిక నీవని 

కానరాని చీకటిలో కూడా

వెన్నెల నీవని, వెలుగువు నీవని

మస్తిష్కంలో పొరల్లో దాగిన

విషయాన్నంతా విశదిస్తావని, 

ఊహామాత్రంగానైనా నీ ఉనికిని

తలిస్తే, మనసులోన మెసల్తే

అది నీవే, నీవే, నీ కృపయేనని!

కరడు గట్టిన శిలలైనా సరే,

విరులు చిందు నీరుబికించేవని

తరుల సిరుల పూయించెదవని, 

పదము పదము, పలికించేవని

సహృదయ శీలత చిందించేవని

విన్నాను, కనుగొన్నారని 

కనుగొన్నారనే తలచాను

పూవులలో, తావిలో, తేనియలలో, మల్లియలలో

మకరందంలో, అందంలో 

లలిత లలిత పద భావనలలో

నాట్యంలో, గానంలో, పరుగులు

తీసే బాల్యంలో, యవ్వనపు

పరుగులలో, నీ నామంలో

నీ ధ్యానం లో, నీవు చెంతనే 

ఉన్నావనే భావనలో 

నీ భావనల వెల్లువలో

భావములో, తాదాత్మ్యత లో…

నీలోని వినీలాకాశపుటంచులలో

ఆవల, పెనుజీకటికావల, 

పరిమళాలు వెదజల్లే 

నీ స్నేహంలో, నీ పెదవి పైన

రవళించే మోహనరాగంలో

ఎనలేని సమస్త బ్రహ్మాండంలో

కంటికి కనిపించే,  కానరాని

సముదిత లీలామానస లోకంలో

నీ తలపులో నా పిలుపులో

కలలలో కలబోసిన వలపులో

కలవు

కల వు

కలవు!

🟢